PRIMEIRA POSTA.

    Cando se van implantar por primeira vez as liñas de cultivo nunha zona onde non existía este tipo de cultivo, non é moi recomendable colocar cordas para colectores de semente, xa que á ausencia de mexillón adulto na zona, non puido haber aínda posta de ovos, polo que a captación de semente sería practicamente nula.

    Así pois, nestes casos é aconsellable colocar semente traída de colectores doutra zona ou recomendada das rochas.

    En colleitas sucesivas irá aumentando a captación por colectores ata consegui-la cantidade desexada, sempre que se dean as condicións axeitadas.

    A posta de semente nas cordas procedente das rochas, faise a man sen reparar moito na formación do desdobramento. A razón é que a semente pequena móvese con moita facilidade na corda, cubrindo esta en moi pouco tempo, igual que sucede coa semente moi pequena (1cm.), procedente de colectores.

    En cambio, cando a semente para retubar acada un tamaño superior ós 2 cm., cómpre que a corda estea totalmente cuberta dentro dun diámetro non moi grande, 10 cm. aproximadamente. Se a semente é maior, 3-4 cm., podemos chegar a un diámetro de desdobramento entre os 10 e os 13cm., nestes casos xa hai que emprega-la desdobradora.

    O desdobramento pódese facer de varias formas dependendo da cantidade de semente e do emprazamento onde se van coloca-las cordas.

    Non é moi recomendable ter moito tempo a semente fóra da auga, máis cando a temperatura é alta. Hai que pensar que a semente aínda terá que ser manipulada para o seu debullamento e selección e todo este proceso faralle perder parte da auga que contén no seu interior. Isto pode afectar negativamente freando o seu crecemento ata que non se recupere do proceso sufrido no debullamento para o seu posterior desdobramento, anque é certo que non hai un gran perigo de mortaldade.

    Esta é unha das causas que nos levaron a perfecciona-la acción da debulladora sobre o mexillón, conseguindo na actualidade que esta acción se efectúe dun xeito máis suave, evitando en parte a perda da auga e permitindo así unhas condicións máis favorables para o molusco.

    É recomendable, sempre que sexa posible, face-lo desdobramento inmediatamente despois de que a semente sexa extraída da auga. Este é un dos factores que acntúan a idoneidade do sistema de long-line continuo, que fai posible que a semente estea moi pouco tempo fóra da auga.

    Outra das vantaxes deste sistema é o pouco espacio que é preciso na embarcación para realizar estas tarefas, aspecto este moi importante cando se trata de embarcacións pequenas.

    Dependendo da cantidade de semente que imos recollendo, loxicamente producirase un exceso importante, polo que nos veremos obrigados a coloca-lo excedente de semente en novas cordas entre liña e liña. Hai que pensar que normalmente o desdobramento faise cun tercio da semente existente nos colectores, aproximadamente. Nestes casos cómpre ter liñas libres para coloca-las novas cordas obtidas co excedente de semente.